Luke 5

Mago vaya'mogi ali'ya ya'apimo atale e'a Yesu'a akame hu'a u'naya gemae

(Mt 4:18-22; Mk 1:16-20)

1Yesu'a mago afina'mo ani kotu'mo agi'amo Genesaleti ani kotute'mo he tino mai'nige'apae'mo asole vaya'mogimo Goti ge'amo afisayafe'mo e'a male'a apali'nae. 2Agaemo ageyana lole sipila'mo ani agi'nale'mo hane'na'ageno age'niye. Noyame ne'aliya vaya'mo sipifati'mo atale'a lami'a umeni'apimo sese hu'a mai'nae. 3Yesu'a Saimoni sipifi'mo haino mai'neno'ae'mo, aise'amo afa'a faika ago'ya failika ugapiye, huno afi ge'nigeno aeno ago'ya failino u'niye. Yesu'a sipifi'mo fai mai'neno'ae'mo alino apaya male'niye.

4Hapa paino hano huteno Saimonife'mo, ani folagapi'mo uka umenimo alitapa anipi'mo yaga au male'netapa noyamemo aliyo, huno ha pai'nigeno'ae'mo, 5Tisao, muki hani'ilagamo umeni male'nonana mago noyamemo o'ali'nona'monanafa gekamo afite'na umenimo anipi'mo ali'na yaga au'na malegauve, huno ha pai'nige'apae'mo 6umenimo ali'a anipi'mo yaga au male'nageno'ae'mo asole noyamemo e'a hai'a havai te'nageno umeni'apimo aino kapalu aegefe'mo hu'niye. 7Aino kapalu aegefe'mo hu'nige'apae'mo alu sipifi'mo apakae'e'mo magokepi lokae'a ali'ya'mo ne'aliya vaya'aife'mo apayaku ai'a ge hu'nage'a e'nage'apae'mo lole sipifi'mo noyamemo ali'a vayu hu'a male'nage'ana lole sipila'mo ae'ana lapanegefe hu'na'ae. 8Saimoni Pita'a ani kava'mo ageteno Yesu aiyafi'mo ago'ya fai'neno'ae'mo, Ala kava nene, hosu vekamo mai'novanagi nataleka uvo, huno ha pai'niye. 9Lusi kava huno hau ai'niya'mofe'mo ani gemo ha pai'niye. Asole noyamemo ali'naya'mofe'mo Saimoni'e'mo magokepi lokae'a mai'naya vaya'mogi'e'mo hapau ai'nae. 10Yemisi'e Yoni'e'mo Saimonigi'e'mo magokepi lokae'a ali'ya'mo ne'ali'a vekala'mogani'e'mo ani kava hu'ana hanau ai'na'ae. Yesu'a Saimonife'mo, ani kavafe'mo koli osuvo. Noyamemo ne'alina kava huka vaya'mo apavalelika nagaetegamo egane, huno ha pai'nige'apae'mo 11lole sipila'mo alini e'a ani agi'nale'mo ava'yi hute'apae'mo muki ya'apimo atale'a akame hu'a u'nae.

Yesu'a lepalosi ya'mo hau'niya vekamo alino alagepa huno ate'niya gemae

(Mt 8:1-4; Mk 1:40-45)

12Yesu'a mago taonifi'mo mai'nigeno'ae'mo mago vekamo lusi kava huno lepalosi ya'mo hau'niya vekamo'mo eno Yesu'mo ageteno'ae'mo augosalegati'mo ago'ya fai'neno'ae'mo, Ala kava nene, kahao ke hovanagi, kahau'nisiyana afa'a alika alagepa huka nategane, huno ha pai'nigeno 13aya'mo aeno hayo huno agufale'mo aya'mo male'neno'ae'mo, nahau'niyanagi kagufalafa'mo alino hamaleno, huno ha nepaigeno'ae'mo lepalosi ya'mo hau'niya ya'amo hano hu'niye. 14Yesu'a, mago vekae'mo uka ha opaika mono huno ne'apateya vekalegage'mo uka kagufamo alika aveligeno kageno alagepa hino. Alika apavelisanage'a vaya'mogi agesayafe'mo Mosese'a hiyo, huno hu'niya ofalinimo kagufalafa'mo alino hamale'niya kavatefe'mo ofalinimo amiyo, huno ha pai'niye. 15Huno ha pai'niya'monanafa Yesufe'mo ava gemo mago'e mago'e huno aino atagu faeno uneno hu'nige'apae'mo muki asole vaya'mogimo ani gemo afite'apae'mo kaita hapau'niya vaya'mo alino hapageno apatesiyafe'mo Yesutegamo e'a ali'a anupa hu'a mai'nae. 16Mai'naya'monanafa muki afina'mo apataleno uno ka'me kotegamo nunumu'mo hutale hutale huno mai'niye.

Yesu'a kanage kanaga osuno ne'maiya vekamo alino alagepa huno ate'niya gemae

(Mt 9:1-8; Mk 2:1-12)

17Mago afina'mo Yesu'a mago nopi'mo haino alino apaya ne'malege'apae'mo Falasi vayanagi ke'aepa gemo avo'mo kae'a ali'a apaya ne'malaya vayanagi hu'a Galeliya kotegati'mo muki taoni'afati'mo ege Yutiya kotegati'mo muki taoni'afati'mo ege Yulusalemu taonifati'mo ege hu'a e'a Yesu haopale'mo ali'a anupa hu'a mai'nae. Yesu'a Ala kava ne'mo himamu'amo ali'neno'ae'mo alino alagepa huno apate'niye. 18Mago vaya'mogimo kanage kanaga osuno ne'maiya vekamo hi'yopamo male'a alini e'a Yesu haopale'mo atesayafe'mo hu'naya'monanafa 19nopi'mo ago kili pae'nage'a alini haisaya ka'mo ohane'niye. Nokato'mule'mo alini hai'a ali'a akai male'ne'apae'mo hi'yopa kayote'mo nofi aete'a aline'a atalageno Yesu'a mai'niya folagapi'mo emine'niye. 20Apakeyana apakesa afi'a fatago hu'nageno apaketeno'ae'mo, Ve'nimo, huno, hosu kavakamo ali'na atale'nove, huno ha pai'nige'apae'mo 21ke'aepa gemo avo'mo kae'a ali'a apaya ne'malaya vaya'mogi'e Falasi vaya'mogi'e'mo ani gemo afite'apae'mo, ani vekamo ina la'ae. Gotife'mo huno faipa huno ne'ate. Gotike'mo vaya'ai hosu kava'apimo afa'a alino atalegaiye, hu'a apaipafi'mo apakesa afi'nae. 22Yesu'a apaipafi'mo apaketeno'ae'mo, na kava higetapae'mo ani agufa lapakesa ne'afiye. 23Haiya agufa gemo lokiya gemo ohane'niye. Hosu kavakamo ali'na atale'nove, hu'na ha pai'nova gemo lokiya gemo ohane'nifi, he tika uvo, hu'na ha paisuva gemo lokiya gemo ohane'niye, huno apafi geno'ae'mo, Vemo Mafa'nemo'a ma mopafi'mo mai'neno'ae'mo vaya'ai hosu kava'apimo alino atalesiya himamu'amo alino lapave ligiye, huno hapa pai'niye. Inagi Yesu'a kanage kanaga osuno ne'maiya vekae'mo, kaha nepauve, he tika yakaikonakamo aliteka nokalega uvo, huno ha pai'nigeno 25apaulagale'mo malage huno he tino yakaikona'amo aliteno no'alega ne'uno'ae'mo Goti agi'ale'mo alino asaga hume asaga hume u'niye. 26Muki vaya'amogimo ani kava'mo agete'apae'mo hapau aite'a Goti agi'ale'mo ali'a asaga hu'a atete atete hute'apae'mo, hemenimo aeto agufa alagepa kava'mo agone, hu'a hu'nae.

Yesu'a Livaife'mo, eka nakame huvo, huno ha pai'niya gemae

(Mt 9:9-13; Mk 2:13-17)

27Huteno Yesu'a taonimo ataleno ne'uno'ae'mo ageyana mago vekamo takesi moni ne'aliya vekamo agi'amo Livai'a takesi monimo ne'aliya nopi'mo fai mai'nigeno ageteno'ae'mo, eka nakame huvo, huno ha pai'nigeno 28he tino muki ya'amo ataleno eno akame hu'niye. 29Livai'a no'afi'mo Yesu'mo lusi yagita huno ate'nige'apae'mo hi'yalamute'mo Yesu'agi takesi moni ne'aliya vayanagi alu vayanagi hu'a anakae'e'mo magokepi lokae'a fai mai'ne'a ne'ya'mo ne'nae. 30Falasi vaya'e Falasi vayapati vaya'mogimo ke'aepa gemo avo'mo kae'a ali'a apaya ne'malaya vaya'mogi'e'mo apakete'apae'mo ge'amo ne'afiya vaya'aife'mo hagalu hagalu hu'a ge hu'apae'mo, na kava higetapa takesi moni ne'aliya vaya'e hosu vaya'e'mo magokepi lokaetapa mai'netapa ne'ya'e ani'e'mo ne'nae, hu'a apafi ge'nageno 31Yesu'a ge'apile'mo aeno atagaina huno'ae'mo, lota vekamo'a afa'a mai'naya vaya'aitegamo uno ali'ya'mo no'alifa kaita hapau'niya vaya'aitegage'mo uno ali'ya'mo ne'aliye. 32Nagaemo alagepa vaya'aife'mo ge hisuvafe'mo o'me'nofa hosu vaya'aife'mo ge hisuge'a e'a apaipamo ali'a afe lesayafe'mo emi'ne'nove, huno hapa pai'niye.

Ne'ya'mo o'ne'a mo nesiya kavafe'mo hu'niya gemae

(Mt 9:14-17; Mk 2:18-22)

33Apakaemo Yesufe'mo, Yoni ge'amo ne'afiya vaya'e Falasi vaya'ai ge'apimo ne'afiya vaya'mogi'e'mo ne'ya'mo o'ne'a mo si'ne'a nunumu hute hute hu'naya'monanafa gekamo ne'afiya vaya'mogimo ne'ya'mo mo osi'a muki afina'mo ne'nae, hu'a ha pai'nageno 34Yesu'a, a'mo lagauli'a ne'vaya afina'mo a'mo alisiya vekamo'a vaya'a'e'mo magokepi lokae'a mai'ne'apae'mo ne'ya'mo mo osi'a afa'a ne'nae. 35Henaga'amo kame vaya'amogi a'mo alisiya vekamo vaya'alegati'mo avaleli'a usage'apae'mo ne'ya'mo o'ne'a mo sigae. 36Yesu'a mago'e huno aeno kalafefa gemo huno hapa paino'ae'mo, atafa kukenamo apake ne'aige'apae'mo saufa kukenaleti'mo lagau'a atafa kukenale'mo nofakaniye. Lagausiya'mo'mo saufa kukenamo hosugiye. Saufa kukena atupaleti'mo lagau'a atafa kukenale'mo fakanisayana alu ya alu ya'mo hanegaiye. 37Saufa nofi alagafati ani'mo ali'a atafa afu agufa ke'mo ago vai'niya kepi'mo nolakiye. Ali'a lakisiya'mo'mo saufa ani'mo hane'niya'mofe'mo aeno apafu leteno afu agufa ke'mo aeno apalo atino ani'mo mopafi'mo asagauno aisigeno'ae'mo afu agufa ke'mo atalagaugiye. 38Saufa ani'mo saufa afu agufa kepike'mo ali'a lakisaya'mo'mo ani'e ke'e'mo afa'a hanegaiye. 39Vaya'mogi atafa nofi alagafati ani'mo nete'apae'mo, nofi alagafati'mo ani'mo saufa ani'mo negaune, hu'a nosae. Atafa ani'mo ago aeno agase'niye, hu'a nehaya'mofe'mae, huno hapa pai'niye.